முக்கிய அறிவிப்பு : 8ஆவது ஊதியக் குழுவிற்கு மத்திய அமைச்சரவை ஒப்புதல்

மத்திய அரசு ஊழியர்களின் சம்பளத்தை திருத்தும் நோக்கில், 8ஆவது ஊதியக் குழுவை அமைக்க பிரதமர் நரேந்திர மோடி தலைமையிலான மத்திய அமைச்சரவை ஒப்புதல் அளித்துள்ளது.  

டெல்லியில் செய்தியாளர்களிடம் பேசிய மத்திய அமைச்சர் அஸ்வினி வைஷ்ணவ், "மத்திய அரசு ஊழியர்கள் மற்றும் ஓய்வூதியதாரர்களின் சம்பள திருத்தத்திற்காக 8ஆவது ஊதியக் குழுவை அமைக்க அமைச்சரவை ஒப்புதல் அளித்துள்ளது. பிரதமர் தலைமையில் நடைபெற்ற அமைச்சரவை கூட்டத்தில் இந்த முடிவு எடுக்கப்பட்டது. குழுவின் தலைவரும் இரண்டு உறுப்பினர்களும் விரைவில் நியமிக்கப்படுவார்கள்," என்று தெரிவித்தார்.  

ஊதியக் குழுவின் முக்கியத்துவம்

மத்திய அரசு, தனது ஊழியர்களின் சம்பள அமைப்பை ஒவ்வொரு பத்து ஆண்டுகளுக்கும் ஒருமுறை திருத்திக்கொள்ள ஊதியக் குழுவை அமைக்கிறது. இந்த குழு ஊழியர்களின் சம்பள திருத்தத்தோடு மட்டுமல்லாமல், ஓய்வூதிய மற்றும் பிற கொடுப்பனவுகளையும் நிர்ணயிக்கிறது.  

7ஆவது ஊதியக் குழுவின் காலம் முடிவடைந்தது 

2016ஆம் ஆண்டு அமைக்கப்பட்ட 7ஆவது ஊதியக் குழுவின் பதவிக்காலம் 2026ஆம் ஆண்டு முடிவடைகிறது. இதையடுத்து, புதிய 8ஆவது ஊதியக் குழுவை அமைப்பதற்கான நடவடிக்கைகள் தற்போது துவங்கியுள்ளன.  

7ஆவது ஊதியக் குழுவில் நடந்த மாற்றங்கள்

7ஆவது ஊதியக் குழுவின் பரிந்துரைகளின் அடிப்படையில், அடிப்படை ஊதியம் மற்றும் ஓய்வூதியத்தில் முக்கியமான மாற்றங்கள் செய்யப்பட்டன:  

• அடிப்படை ஊதியம்:ரூ.7,000லிருந்து ரூ.18,000 ஆக உயர்வு  
• குறைந்தபட்ச ஓய்வூதியம்:ரூ.3,500ல் இருந்து ரூ.9,000 ஆக உயர்வு  
• அதிகபட்ச சம்பளம்:ரூ.2,50,000 ஆக உயர்வு  
• அதிகபட்ச ஓய்வூதியம்:ரூ.1,25,000 ஆக உயர்வு  

அதோடு, 7ஆவது ஊதியக் குழுவில் ஊழியர்கள் 3.68 ஃபிட்மென்ட் காரணியை கோரியிருந்த போதிலும், அரசு 2.57 ஃபிட்மென்ட் காரணியை நிர்ணயித்தது. ஃபிட்மென்ட் காரணி என்பது சம்பள மற்றும் ஓய்வூதியத்தை கணக்கிடுவதற்கான முறைவாதமாகும்.  

தற்போதைய நிலை

8ஆவது ஊதியக் குழுவின் அமைப்பால் மத்திய அரசு ஊழியர்களுக்கும் ஓய்வூதியதாரர்களுக்கும் எதிர்பார்க்கப்பட்ட முக்கிய மாற்றங்கள் ஏற்படும் வாய்ப்புள்ளது.