பள்ளிகளில் மாணவிகளுக்கு தற்காப்புப் பயிற்சி கட்டாயம் மத்திய அமைச்சர்

பெண் குழந்தைகளின் பாதுகாப்பை கருத்தில் கொண்டு, பள்ளிகளில் மாணவிகளுக்கு தற்காப்புப் பயிற்சி கட்டாயமாக அளிக்க வேண்டும் என்று மத்திய மனிதவள மேம்பாட்டுத்துறை அமைச்சர் ரமேஷ் போக்ரியால் நிஷாங்க் வலியுறுத்தியுள்ளார்.

நாடாளுமன்றத்தில் கேள்வி ஒன்றுக்கு பதில் அளித்துப் பேசிய அவர், பெண் குழந்தைகளின் பாதுகாப்பைக் கருத்தில் கொண்டு, அரசு பள்ளிகளில் ஆறாம் வகுப்பு முதல் பன்னிரெண்டாம் வகுப்பு வரை படிக்கும் சிறுமிகளுக்கு தற்காப்புப் பயிற்சி அளிக்கப்பட்டு வருகிறது என்றார்.

பெண்கள் மத்தியில் தற்காப்பு மற்றும் சுய மேம்பாட்டுக்கான வாழ்க்கைத் திறன் உள்ளிட்டவை மேம்பட வேண்டும்' என்று தெரிவித்தார். பெண்களின் பாதுகாப்பை மேம்படுத்தும் நோக்கில் மத்திய அரசு பல்வேறு திட்டங்களை செயல்படுத்தி வருகிறது.

இந்த நோக்கத்திற்கான நிதி பள்ளிகளுக்கு மூன்று மாதங்களுக்கு வழங்கப்படுகிறது. மாதத்திற்கு ஒரு பள்ளிக்கு ரூ .3,000 வழங்கப்பட்டு வருவதாக ரமேஷ் போக்ரியால் தெரிவித்தார்.

மத்திய இடைநிலைக் கல்வி வாரியம் (சிபிஎஸ்இ) அதனுடன் இணைந்த பள்ளிகளுக்கு 2015 ஆம் ஆண்டில் ஒரு வாரத்திற்கு இரண்டு முறை I-X வகுப்புகளில் சிறுமிகளுக்கு தற்காப்பு பயிற்சி அளிக்க வேண்டியதன் அவசியம் குறித்து ஒரு ஆலோசனையை வெளியிட்டது குறிப்பிடத்தக்கது.